བྱུང་རིམ་ངོ་སྤྲོད།

དབུས་སྟོད་བྱམས་པ་གླིང་ནི་རྒྱུད་ཆེན་ཀུན་དགའ་དོན་གྲུབ་ཀྱི་གདན་ས་དཔལ་ལྡན་རྒྱུད་སྟོད་གྲྭ་ཚང་ཞེས་པ་དེ་ཡིན། དེ་ཡང་རྒྱུད་ཆེན་ཀུན་དགའ་དོན་གྲུབ་མཆོག་དང་ཉེ་གནས་ཀུན་དགའ་བཀྲ་ཤིས་གཉིས་གནས་དེར་ཕེབས་ཤིང་། སློབ་མའི་ཚོགས་དང་བཅས་པས་དབྱར་གནས་མཛད་དེ་བཞུགས་པ་དང་། རྒྱུད་ཀྱི་འཆད་ཉན་སོགས་གནང་ནས་རྒྱུད་སྟོད་གྲྭ་ཚང་ཞེས་ཡོངས་སུ་གྲགས་པ་དེ་བྱུང་། རྒྱུད་ཆེན་ཀུན་དགའ་དོན་གྲུབ་མཆོག་ནི་ས་ཕག་ལོ་སྟེ་ཕྱི་ལོ་ ༡༤༡༩ ལོར་གཙང་དུ་འཁྲུངས། ནར་སོན་རྗེས་རྒྱལ་བ་དགེ་འདུན་གྲུབ་པ་དང་རྗེ་བཙུན་ཤེས་རབ་སེང་གེ། (more…)

རྒྱས་བཏབ་ར་མོ་ཆེའི་གཙུག་ལག་ཁང་འདི་ཉིད་དུས་རབས་བདུན་པའི་ནང་བོད་ཀྱི་གནམ་སའི་དབང་ཕྱུག་ཆེན་པོ་རྒྱལ་པོ་སྲོང་བཙན་སྒམ་པོའི་བཙུན་མོ་རྗེ་བཙུན་སྒྲོལ་མའི་རྣམ་སྤྲུལ་རྒྱ་བཟའ་ཀོང་ཇོས་གདན་དྲངས་པའི་ཇོ་བོ་ཤཱཀྱ་མུ་ནེའི་བཞུགས་གནས་སུ་བཞེངས། འདི་ཉིད་ལོ་རྒྱུས་ཆེས་རིང་ཞིང་བྱིན་རླབས་ཤིན་ཏུ་ཆེ་བའི་གཙུག་ལག་ཁང་ཞིག་ཡིན། འདི་ཉིད་དཔལ་ལྡན་རྒྱུད་སྟོད་གྲྭ་ཚང་ལ་བདག་ཐོབ་བྱུང་ཚུལ་ནི། རབ་བྱུང་བརྒྱད་པའི་ཤིང་རྟ་སྟེ་ཕྱི་ལོ་ ༡༤༧༤ ལོར་མཁས་གྲུབ་ཆེན་པོ་རྒྱུད་ཆེན་ཀུན་དགའ་དོན་གྲུབ་མཆོག་གིས་དབུས་སྟོད་བྱམས་པ་གླིང་དུ་དཔལ་ལྡན་རྒྱུད་སྟོད་གྲྭ་ཚང་ཕྱག་བཏབ་སྟེ་རྒྱུད་ཀྱི་འཆད་ཉན་མཛད། (more…)

ཕྱི་་ལོ་༡༩༥༩ ལོར་སྔ་ན་མ་གྲགས་པའི་བོད་ལ་དུས་འགྱུར་ཆེན་པོ་ཞིག་བྱུང་བའི་རྐྱེན་གྱིས་རང་ཅག་རྣམས་ཀྱི་འདྲེན་མཆོག་བླ་ན་མ་མཆིས་པ་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བླ་སྤྲུལ་དགེ་བཤེས། གཞུང་ཞབས་ལས་བྱེད་སོགས་མདོར་ན་བོད་ཡུལ་སྟོད་སྨད་བར་གསུམ་ནས་ཕེབས་པའི་བོད་མི་འབུམ་ཕྲག་བརྒལ་བ་བཙན་བྱོལ་དུ་ཡོང་དགོས་བྱུང་ནས་རྒྱ་གར་འཕགས་པའི་ཡུལ་དུ་འབྱོར་ཡོད། ཁ་བ་གངས་ཅན་པའི་ཡུལ་ལུང་སྤྱི་ལ་གོད་ཆག་བྱུང་བ་བཞིན་གསང་སྔགས་རིག་པ་འཛིན་པའི་སྡེ་ཆེན་པོ་དཔལ་ལྡན་སྟོད་རྒྱུད་གྲྭ་ཚང་གི་དགེ་འདུན་པ་རྣམས་ཀྱང་ར་ཆེ་གཙུག་ལག་ཁང་དུ་སྔར་རྒྱུན་བཞིན་སྡོད་དབང་མེད་པ་སྤྱི་མཚུངས་ལྟར་ཡིན་པས། སྐབས་དེར་གྲྭ་ཚང་གི་དགེ་འདུན་པ་རྣམས་འགའ་ཞིག་ཕ་ཡུལ་ཕྱོགས་ལ་ཕྱིན་པ་དང་།འགའ་ཞིག་ངེས་མེད་རི་ལ་བྲོས་པ་དང་། མང་པོ་ཞིག་༸སྐྱབས་མགོན་རྒྱལ་བའི་དབང་པོ་མཆོག་གི་སྐུ་རྗེས་སུ་རྒྱ་གར་འཕགས་པའི་ཡུལ་ལ་ཁ་གཏད་ནས་ཡོང་བ་སོགས་སྣ་ཚོགས་ཤིག་བྱུང་བའི་ནང་ནས་དགེ་འདུན་པ་ ༨༣ ཙམ་རྒྱ་གར་འཕགས་པའི་ཡུལ་དུ་ཕེབས་ཐུབ་པ་བྱུང་ཡོད། རྒྱ་གར་འཕགས་པའི་ཡུལ་དུ་འབྱོར་བའི་སྐབས་༸གོང་ས་སྐྱབས་མགོན་ཆེན་པོ་མཆོག་གི་བཀའ་དྲིན་ལ་བརྟེན་ནས་སྡོད་ས་དང་བཟའ་ཆས་སོགས་སྣེ་ལེན་ཡོད་ན་ཡང་རང་ཡུལ་ཤོར་ནས་གཞན་ཡུལ་དུ་འཚོ་གནས་བྱ་དགོས་པས་ཕྱོགས་གང་ཐད་ནས་དཀའ་ངལ་མང་པོ་ཞིག་ཡོད་པ་ཤོད་ག་ལ་དགོས། དེར་བརྟེན་དགེ་འདུན་པ་རྣམས་ཀྱིས་མ་འོངས་འདུས་མང་གི་འཚོ་གནས་དང་། གསང་སྔགས་རིག་པ་འཛིན་པའི་སྡེ་ཆེན་པོ་དཔལ་ལྡན་སྟོད་རྒྱུད་གྲྭ་ཚང་འདི་ཉིད་བསྐྱར་གསོ་ཡོང་ཆེད་ཕྱོགས་གཅིག་ནས་བཟོ་གྲྭ་སོགས་ཀྱི་ཕྱག་ལས་གནང་ནས་དཔལ་འབྱོར་གྱི་ཡོང་སྒོ་བཙལ་བ་དང་། ཕྱོགས་གཞན་ནས་བསླབ་པ་སློབ་གཉེར་བྱས་ནས་མཐོང་བ་བརྒྱུད་པའི་ཕྱག་བཞེས་རྣམས་མི་ཉམས་རྒྱུན་གནས་ལ་འབད་པ་སོགས་དཀའ་བ་བརྒྱ་ཕྲག་དུ་མའི་སྒོ་ནས་བསྟན་པའི་མེ་རོ་སླར་གསོའི་ལས་རིམ་ལ་བརྩོན་པ་ལྷོད་མེད་གནང་བཞིན་ཌལ་ཧོར་ཞེས་པར་གནས་ས་བཟུང་། དེ་ལྟར་གསང་སྔགས་རིག་འཛིན་གྱི་སྡེ་ཆེན་པོ་དཔལ་ལྡན་སྟོད་རྒྱུད་གྲྭ་ཚང་ཞེས་ཡོངས་སུ་གྲགས་པ་དེ་ཉིད་ཀྱི་མཚན་གནས་སླར་གསོ་དང་འཆད་ཉན་གྱི་གནས་གཞི་ཚུགས། ཕྱི་ལོ་ ༡༩༦༠ ལོར་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ཡེ་ཤེས་དབྱིངས་དཔྱད་ཀྱི་གཟིགས་པ་ཆེན་པོས་རྒྱུད་སྟོད་གྲྭ་ཚང་གི་མཁན་བླ་གཅིག་ལྕོགས་འོས་མི་བླ་སྤྲུལ་དགེ་བཤེས་མང་པོ་ཡོད་པའི་ནང་ནས་བཀའ་བབ་དུས་སུ་སྨིན་པ། སྤང་དགོན་རིན་པོ་ཆེ་སྐུ་ཕྲེང་བཅུ་དྲུག་པ་ངག་དབང་འཕྲིན་ལས་མཆོག་ལ་ཕྱག་རྟགས་གསོལ་བསྩལ་གནང་། རིན་པོ་ཆེ་མཆོག་ནས་བླ་ན་མེད་པའི་ཐུགས་བསྐྱེད་ཟབ་མོས་ཆོས་དང་ཟང་ཟིང་གང་ཐད་ནས་ཐུགས་འགན་བཞེས་ཏེ་དཔལ་ལྡན་སྟོད་རྒྱུད་གྲྭ་ཚང་གི་བསླབ་པ་སློབ་གཉེར། ཁྲིམས་སྒྲིག་ལམ། དཔལ་འབྱོར་འདུ་འགོད་སོགས་སྒོ་གང་ས་ནས་མཛད་རྗེས་བླ་ན་མེད་པ་བསྐྱངས། རྒྱུད་པའི་དགེ་འདུན་པ་རྣམས་ཀྱིས་ཀྱང་དབུ་འོག་དཔུང་འདེགས་ལྟ་བུར་ལྷག་བསམ་ཆེར་བསྐྱེད་དང་། ངལ་བ་བརྒྱ་ཕྲག་གི་སྒོ་ནས་མཐོང་བརྒྱུད་ཀྱི་ཕྱག་བཞེས་བཟང་པོ་མི་ཉམས་རྒྱུན་འཛིན་སླད་བསླབ་པ་སློབ་གཉེར་གཙོ་བོར་བྱས་པའི་ཐོག་ལས་དོན་ཆེ་ཕྲ་གང་ཡིན་ལ་མཉམ་རུབ་བྱས་པ། ཐུགས་མཐུན་ཁྲིམས་གཙང་། རྒན་གཞོན་གོ་རིམ། སྒྲིག་སྲོལ་ལམ་ལུགས་སོགས་བསྟན་པའི་མཛེས་རྒྱན་དུ་འགྲོ་བའི་འབད་བརྩོན་གནང་བ་བཞིན་དོན་ལ་གནས་པར་བྱས། དེ་ལྟར་གོང་འོག་ཚང་མས་སེམས་ཤུགས་མཉམ་བསྐྱེད་དང་རྡོག་རྩ་གཅིག་སྒྲིལ་བྱས་པའི་འབྲས་བུར་བསླབ་པ་སློབ་གཉེར་གྱི་རིམ་པ་དང་། ཕྱིའི་དཔལ་འབྱོར་གྱི་འདུ་འགོད་སོགས་སྒོ་གང་ས་ནས་རིམ་གྱིས་ཡར་རྒྱས་གོང་འཕེལ་བྱུང་། གྲྭ་རྒྱུན་གསར་པ་ཡང་མང་དུ་ཕེབས་པ་དག་གྲྭ་ཚང་གི་སྔར་རྒྱུན་ལམ་སྲོལ་བཞིན་དཔེ་མཚམས་པའི་འཛིན་གྲྭར་ཞུགས་ནས་བློ་འཛིན་གྱི་རིམ་པ་དང་། འདོན་རྟ་དབྱངས། ཐིག་རྡུལ་ཚོན། གཏོར་མ་མེ་རི། འབུད་རྡུང་དཀྲོལ་གསུམ་སོགས་མཐོང་བརྒྱུད་ཀྱི་ཕྱག་བཞེས་དང་། གསང་སྔགས་རྡོ་རྗེ་ཐེག་པའི་གཞུང་ཆེན་ཁག་དང་དེང་རབས་ཀྱི་རིག་གནས་སོགས་སློབ་གཉེར་གྱི་རིམ་པ་རྣམས་རྐང་ཚུགས་པ་བྱས། དེ་ལྟར་བྱེས་སུ་རྒྱུད་སྟོད་གྲྭ་ཚང་མེད་པ་ནས་ཡོད་པ་དང་། ཡོད་པ་ནས་གོང་འཕེལ་གྱི་རྣམ་པའི་སྒོ་ནས་ཕྱི་ལོ་ ༡༩༧༤ བར་རྒྱ་གར་ཧི་མ་ཅལ་མངའ་སྡེའི་ཁོངས་ཌལ་ཧོར་དུ་བཞུགས།

དེ་ཡང་རང་གཞུང་གི་བཀོད་སྒྲིག་འོག་གཞིས་ཆགས་ཁག་དང་། དགོན་སྡེ་སོ་སོར་གནས་གཞིའི་ས་ཆ་གནང་བ་བཞིན་དཔལ་ལྡན་སྟོད་རྒྱུད་གྲྭ་ཚང་གི་ཐོབ་སྐལ་ལྟ་བུར་རྒྱ་གར་བྱང་ཤར་ཨ་རུ་ན་ཅལ་མངའ་ཁོངས་འབུམ་ལ་བསྟན་འཛིན་སྒང་དུ་གནང་བར་བརྟེན། ཕྱི་ལོ་༡༩༧༤ ལོར་འབུམ་ལ་བསྟན་འཛིན་སྒང་དུ་གནས་སྤོས། གཙུག་ལག་ཁང་དང་གྲྭ་ཤག་གསར་བཞེངས་བཅས་སྔར་བཞིན་རྒྱུད་ཀྱི་འཆད་ཉན་དང་། མཐོང་བརྒྱུད་ཀྱི་ཕྱག་སྲོལ་བཟང་པོ་མ་ཉམས་པའི་ཐོག་དུས་དང་བསྟུན་པའི་སློབ་གཉེར་རྣམས་ཚགས་སུ་ཚུད་པ་གནང་བཞིན་ཕྱི་ལོ་ ༡༩༧༤ ནས་ ༡༩༨༨ བར་གནས་དེར་བཞུགས། སྤྱིར་ཁུལ་དེའི་ཡུལ་མི་ཕལ་ཆེར་ནང་པ་ཡིན་པར་མ་ཟད་ཆོས་ལ་དད་པ་ཆེ་བ་དང་། (more…)

འབུམ་ལ་བསྟན་སྒང་གི་གནས་བབ་ནི་སྤྱིར་ས་མཚམས་སུ་འཁེལ་སྟབས་དམིགས་བསལ་དམ་དྲག་ཆེ་བ་དང་། གཞན་ཡང་འགྲུལ་བཞུད་དང་འཕྲོད་བསྟེན་གྲྭ་རྒྱུན་ཕེབས་བསྐྱོད་སོགས་ཀྱི་དཀའ་ངལ་ཆེ་བ་བཅས་ལ་བརྟེན་༸གོང་ས་མཆོག་གི་བཀའ་དགོངས་དང་ལམ་སྟོན་འོག་བཞུགས་སྒར་དུ་གནས་སྤོ་བྱ་འཆར་ཡོད་སྐབས། རྟེན་འབྲེལ་མ་བསྒྲིགས་རང་འགྲིག་གི་ཚུལ་དུ་ཕྱི་ལོ་ ༡༩༨༩ ལོར་༸གོང་ས་༸སྐྱབས་མགོན་རྒྱལ་བའི་དབང་པོ་མཆོག་གིས་འཛམ་གླིང་ཞི་བདེའི་གཟེངས་རྟགས་འབུལ་བཞེས་དང་འབྲེལ། (more…)