ལྷ་ས་ར་མོ་ཆེའི་གཙུག་ལག་ཁང་དུ་བཞུགས་པའི་མགོན་པོ་སེ་སྡོང་མ་ཞེས་པ་ནི། རྗེ་ཙོང་ཁ་པའི་རྩ་བའི་བླ་མ་འགྲན་གྱི་དོ་མེད་བཞིའི་ནང་ཚན་ལྷོ་བྲག་གྲུབ་ཆེན་ནམ་མཁའ་རྒྱལ་མཚན་མཆོག་ལྷ་ས་ར་མོ་ཆེར་བཞུགས་སྐབས། ཤིང་སེ་བའི་སྡོང་པོ་ཞིག་ཡོད་པ་དེ་ནམ་ཡིན་ཀྱང་མགོན་པོ་གྲི་གུག་དམར་པོར་དངོས་སུ་གྱུར་ནས་ཞལ་གཟིགས་པའི་གཟིགས་སྣང་འཁྲུངས་པར་བརྟེན་ཤིང་སེ་བའི་སྡོང་པོ་དེ་གཟུངས་ཀྱི་ཚུལ་དུ་བྱས་ཏེ་མགོན་པོའི་སྐུ་བཞེངས་པ་དེ་ཉིད་དེང་སང་མགོན་པོ་སེ་སྡོང་མར་གྲགས་པ་འདི་ཡིན། ༼མགོན་པོ་གྲི་གུག་དམར་པོ་དང་། མགོན་པོ་བེང་དམར་བཅས་ཤོད་སྲོལ་གཉིས་མཆིས།༽དཔལ་ལྡན་སྟོད་རྒྱུད་གྲྭ་ཚང་གི་སྲུང་མའི་གཙོ་བོ་འཕགས་པ་སྤྱན་རས་གཟིགས་དྲག་ཏུ་ཁྲོས་པའི་ཚུལ་བསྟན་པ་མགོན་པོ་ཕྱག་དྲུག་པ་འདི་ཉིད། སྔོན་སངས་རྒྱས་སྣང་བ་མཐའ་ཡས་ཀྱི་སྤྱན་སྔར་བྱང་ཆུབ་མཆོག་ཏུ་ཐུགས་བསྐྱེད། སེམས་ཅན་གྱི་དོན་མཛད་པར་དམ་བཅས་ནས་གལ་སྲིད་དམ་ལས་འདའ་ན་མགོ་བོ་ཚལ་པ་སྟོང་དུ་འགས་པར་གྱུར་ཅིག །ཅེས་སྨོན་ལམ་བཏབ་སྟེ་རི་བོ་པོ་ཏཱ་ལར་སེམས་ཅན་གྱི་དོན་བྱེད་ཅིང་བཞུགས། དུས་སྙིགས་མའི་སེམས་ཅན་གཤིས་རྒྱུད་མ་རུང་བའི་དབང་གིས་ཇེ་ངན་ཇེ་སྡུག་ལ་གྱུར་སྐབས། སེམས་ཅན་གྱི་དོན་བསྒྲུབ་དཀའ་བར་དགོངས་ནས་ཐུགས་ཀྱི་དམ་བཅའ་འདོར་བར་བརྩམ་པ་ན་དེ་མ་ཐག་དབུ་ཚལ་པ་སྟོང་དུ་གྱུར། སངས་རྒྱས་སྣང་བ་མཐའ་ཡས་མདུན་དུ་བྱོན་ནས་སྔར་ཁས་བླངས་པའི་དམ་ཚིག་དེ་ཚར་གཅིག་སྐྱོར་གསུངས་པ་བཞིན་སྐྱོར་བ་ན་ཕྱག་དྲུག་ཏུ་གྱུར་ཏེ་སླར་ཡང་ཉིན་མཚན་དབྱེར་མེད་དུ་འགྲོ་བའི་དོན་མཛད་ཅིང་བཞུགས་སོ།། དེ་ནས་ནམ་ཞིག་དཔལ་ལྡན་འབྲས་སྤུངས་དང་ཉེ་བའི་གྲོང་ཁྱེར་ཞིག་ན། བྲམ་ཟེ་ཤ་བ་རིའི་རིགས་ཏྲི་པ་ལ་ཞེས་པ་རོལ་མོ་ལ་མཁས་པ། སྔོན་སངས་རྒྱས་བཅོམ་ལྡན་འདས་ལ་རོལ་མོའི་མཆོད་པ་ཕུལ་ནས་མཉེས་པར་བྱེད་པ་ཞིག་ཡོད་པ་དེ། དུར་ཁྲོད་བསིལ་བའི་ཚལ་ན་འཇག་མའི་སྤྱིལ་བུའི་ནང་སྒོམ་ལ་བཞུགས་པའི་སྐབས། ཉིན་ཞིག་བར་སྣང་ནས་སྒྲ་ཆེན་པོ་ཞིག་གྲག་པ་དེར་གཟིགས་པ་ན། མགོན་པོ་ཕྱག་དྲུག་པ་འདིའི་ཞལ་གཟིགས། མགོན་པོའི་ཞལ་ནས་ངའི་སྒྲུབ་ཐབས་འདི་ཁྱེད་ལ་གཏད་པ་ཡིན་པས་ཡིད་ལ་ཟུངས་ཤིག་ཅེས་གསུངས་ཏེ་གནང་བ་བཞིན་གདམས་པ་རྣམས་ཡི་གེར་བཏབ་སྟེ་སྙན་བརྒྱུད་ཀྱི་སྒོ་ནས་སྤེལ་བར་གྲགས།
སྤྱིར་གནས་ལ་ངེས་པ་མ་མཆིས་ཀྱང་སེམས་ཅན་གྱི་སྣང་ངོར་བཞུགས་པའི་ཚུལ་བསྟན་པ་ནི་རྒྱ་གར་རྡོ་རྗེ་གདན་དང་ཉེ་བའི་གནས། དུར་ཁྲོད་ཆེན་པོ་བསིལ་བ་ཚལ་ཤིང་ཙནྡན་རྐང་གཅིག་པའི་དྲུང་དུ་ཡིན། ཞལ་གཅིག་ཕྱག་དྲུག་པའི་རྣམ་པ་ཅན། སྐུ་ལ་གླང་ཆེན་དཀར་པོའི་ཀོ་བ་མནབས་ཤིང་། ཕྱག་དྲུག་གི་དང་པོ་གཉིས་ལ་གྲི་གུག་དང་ཐོད་པ། བར་པ་གཉིས་ན་མི་མགོའི་ཕྲེང་བ་དང་མདུང་རྩེ་གསུམ་པ། ཐ་མ་གཉིས་སུ་ཌ་མ་རུ་དང་ཞགས་པ་བཟུང་བ། ཕྱག་དང་ཞབས་སོགས་ལ་སྦྲུལ་དཀར་སྔོན་སོགས་བརྒྱད་དང་དྲིལ་བུ་གཡེར་ཁའི་ཕྲེང་བས་བརྒྱན་པ། དབུ་ལ་ཐོད་པ་སྐམ་པོ་ལྔ་དང་། རློན་པ་ལྔ་བཅུ་རྩ་གཅིག་གི་དོ་ཤལ་སྤྲས་པ། སྟག་ལྤགས་ཀྱི་ཤམ་ཐབས་གསོལ་བ། ཚོགས་བདག་གླང་སྣ་དཀར་པོའི་སྟེང་དུ་བཞེངས་ནས་མེ་དཔུང་འབར་བའི་དབུས་ན་བཞུགས་ཡོད།
འདི་ཉིད་བཀའ་གཉན་པ་དང་འཕྲིན་ལས་མྱུར་བས་འཇམ་མགོན་བླ་མ་ཙོང་ཁ་པ་ཆེན་པོ་མཆོག་གིས་སྐྱེས་བུ་གསུམ་གྱི་ལམ་གྱི་སྲུང་མའི་གཙོ་བོར་བཞག་པ་དང་། དཔལ་ལྡན་སྟོད་རྒྱུད་གྲྭ་ཚང་གིས་སྲུང་མའི་གཙོ་བོར་བསྟེན་དང་སྟེན་གྱིན་ཡོད།