དབུས་སྟོད་བྱམས་པ་གླིང་ནི་རྒྱུད་ཆེན་ཀུན་དགའ་དོན་གྲུབ་ཀྱི་གདན་ས་དཔལ་ལྡན་རྒྱུད་སྟོད་གྲྭ་ཚང་ཞེས་པ་དེ་ཡིན། དེ་ཡང་རྒྱུད་ཆེན་ཀུན་དགའ་དོན་གྲུབ་མཆོག་དང་ཉེ་གནས་ཀུན་དགའ་བཀྲ་ཤིས་གཉིས་གནས་དེར་ཕེབས་ཤིང་། སློབ་མའི་ཚོགས་དང་བཅས་པས་དབྱར་གནས་མཛད་དེ་བཞུགས་པ་དང་། རྒྱུད་ཀྱི་འཆད་ཉན་སོགས་གནང་ནས་རྒྱུད་སྟོད་གྲྭ་ཚང་ཞེས་ཡོངས་སུ་གྲགས་པ་དེ་བྱུང་། རྒྱུད་ཆེན་ཀུན་དགའ་དོན་གྲུབ་མཆོག་ནི་ས་ཕག་ལོ་སྟེ་ཕྱི་ལོ་ ༡༤༡༩ ལོར་གཙང་དུ་འཁྲུངས། ནར་སོན་རྗེས་རྒྱལ་བ་དགེ་འདུན་གྲུབ་པ་དང་རྗེ་བཙུན་ཤེས་རབ་སེང་གེ།རྒྱུད་ཆེན་སྦྱིན་པ་དཔལ་བ། བ་སོ་ཆོས་རྗེ། བྱང་རྩེ་ཀུན་དགའ་བཀྲ་ཤིས་སོགས་བླ་མར་བསྟེན་ནས་མདོ་རྒྱུད་གཉིས་ལ་མཁས་པར་གྱུར། ལྷག་པར་རྒྱུད་སྡེ་ལ་ནང་བྱན་ཆུད་པས་རྒྱུད་པའི་འདུས་མང་ཡོངས་ནས་རྒྱུད་པའི་མཁན་པོར་ཕེབས་པར་གསོལ་བ་བཏབ་ཀྱང་ཞལ་གྱིས་མ་བཞེས་པར་རྗེ་བླ་མས་རྗེ་བཙུན་ཤེས་རབ་སེངྒེ་ལ་གཏད་པའི་རྒྱུད་ཀྱི་ཆོས་དཔེ་དང་ནང་མཆོད་ཀ་པཱ་ལི། གསང་འདུས་ཀྱི་སྐུ་རྟེན་སོགས་བསྣམས་ཏེ་ཕྱིའི་རྐྱེན་སྔར་དབེན་གནས་དེའི་དགེ་མཚན་མཐོང་བ་དང་། ནང་གི་རྐྱེན་མ་འོངས་རྒྱུད་ཀྱི་འཆད་ཉན་འཕེལ་བ་ཐུགས་ལ་བརྣགས་ཏེ་དབུས་སྟོད་བྱམས་པ་གླིང་དུ་ཕེབས། གནས་འདིར་བྱོན་པའི་ཉིན་མོ་དེར་བུ་སློབ་སོ་གཉིས་འདུས་པས་དཔལ་གསང་བ་འདུས་པའི་ལྷ་གྲངས་དང་མཉམ་པའི་རྟེན་འབྲེལ་ལེགས་པར་འགྲིགས་ཤིང་། གནས་དེའི་ཉེ་འཁོར་གྱི་ཆུ་བོས་ཀྱང་གསང་བ་འདུས་པའི་རྩ་སྔགས་ཀྱི་སྒྲ་སྒྲོག་པ་སོགས་ངོ་མཚར་བའི་ལྟས་བཟང་མང་པོ་བྱུང་།
ད་ལྟའི་དུས་སུ་ཡང་ཆུའི་མིང་ལ་བཛྲ་དྷྲིཀ་ཅེས་འབོད་བཞིན་ཡོད། ཕྱིས་རྒྱུད་ཆེན་ཤེས་རབ་བཟང་པོས་རྒྱུད་པའི་སློབ་དཔོན་དུ་ཕེབས་པར་ཞུ་སྐུལ་མང་དུ་མཛད་ཀྱང་མཚན་མོར་མནལ་ལམ་དུ་ལ་མོ་དང་ཕག་མོའི་བར་ཡོལ་བས་བཅད་པ་རྨིས་པས་གནས་དེར་བཞུགས་ན་འགྲོ་དོན་ཆེ་བར་དགོངས་པ་དང་། བྱམས་སྐུ་བྱིན་ཅན་ལ་མང་དུ་མཆོད་ཅིང་གསོལ་བ་ཡང་ཡང་བཏབས་པས་འདིར་བཞུགས་ན་ལེགས་པའི་མཚན་མ་བྱུང་བ་སོགས་ལས་བྱམས་གླིང་དང་དབྱེ་བོ་དགོན། འོད་སྣ། ཆུམས་མདའ། རན་ཙ་སོགས་དབུས་སྟོད་ཁུལ་རང་དུ་རྒྱུད་ཀྱི་འཆད་ཁྲིད་གནང་བཞིན་བཞུགས་པས་སློབ་ཚོགས་མང་ཞིང་རྒྱུད་ཀྱི་འཆད་ཉན་འཕེལ་བ་སོགས་བྱུང་བར་བརྟེན་མཁའ་ལ་ཉི་ཟླ་གཉིས་དང་ས་ལ་རྒྱུད་གྲྭ་གཉིས་སུ་གྲགས་པའི་ཡ་གྱལ་རྒྱུད་སྟོད་གྲྭ་ཚང་ཞེས་སྙན་གྲགས་ཕྱོགས་བཅུར་འབར་བ་དེ་ཉིད་བྱུང་བ་ཡིན། མཐར་རྒྱུད་པ་གྲྭ་ཚང་ངམ་དབུས་སྟོད་བྱམས་པ་གླིང་དུ་ངོ་མཚར་བའི་ལྟས་དང་བཅས་ཏེ་སྐུ་གཤེགས། སྐུ་མྱ་ངན་ལས་འདས་པའི་ཚེ་ངོ་མཚར་བའི་ལྟས་བཟང་མང་དུ་བྱུང་ཞིང་། སྐུ་གདུང་ཞུགས་ལ་འབུལ་སྐབས་རིང་བསྲེལ་དང་ཐུགས་ལྗགས་སོགས་བྱོན་པ་ཡང་བྱམས་པ་གླིང་གི་གསང་བ་འདུས་པའི་གསེར་སྐུའི་ནང་རྟེན་དུ་བཞུགས་ཡོད། དེའི་རྗེས་སུ་རྗེ་ཉིད་ཀྱི་སློབ་མ་རྒྱུད་པ་ལྷ་རིན་པས་གདན་ས་བསྐྱངས། སྤྱིར་གནས་འདི་ནི་རྒྱུད་པ་གྲྭ་ཚང་གི་མ་དགོན་ཡིན་པས་རྒྱུད་པའི་སྐྱེས་ཆེན་དམ་པ་བར་མ་ཆད་པས་ཞབས་ཀྱིས་བཅགས་ཤིང་བྱིན་གྱིས་བརླབས་པས། རྒྱུད་ཀྱི་འཆད་ཉན་འཕེལ་བ་དང་ཐུགས་དམ་རྒྱས་ས་ཡིན་པ་སྨོས་ཅི་དགོས། དེ་མིན་རྒྱལ་བ་དགེ་འདུན་རྒྱ་མཚོ་དང་པཎ་ཆེན་ཡེ་ཤེས་རྩེ་མོ། པཎ་ཆེན་བློ་བཟང་ཆོས་རྒྱན་སོགས་དམ་པ་མང་པོ་ཞིག་ཆེད་དུ་གནས་འདིར་ཕེབས་ཏེ་ཐུགས་སྨོན་གནང་མྱོང་ཡོད། རྒྱུད་ཆེན་ཀུན་དགའ་དོན་གྲུབ་ཀྱིས་བཞེངས་པའི་དགོན་དེའི་ནང་རྟེན་ཡི་དམ་རྡོ་རྗེ་འཇིགས་བྱེད་ཀྱི་སྐུ་རྟེན་བྱིན་ཅན་དེ་རིག་གསར་གོང་རོལ་ཏུ་སྐུ་གཟུགས་ཇེ་ཆེར་ཕྱིན་ཏེ་ལན་གཉིས་ཙམ་ལ་ཁང་པའི་ཐོག་མཐོ་རུ་གཏོང་དགོས་བྱུང་བ་དངོས་སུ་མཐོང་བའི་རྒན་པོ་འགའ་ཡི་ངག་ནས་གླེང་བར་སྐད།